၎-ဧပြီ-၂၀၁၂
မန္တလေးမြို့တွင် ယခုလမှ စပြီး မီးမလာချိန် များလာသည်နှင့် အတူ ရပ်ကွက် အများအပြားတွင် ပြည်သူများ သောက်သုံးရေလည်း အခက်အခဲ ဖြစ်လျှက်ရှိကြောင်း သိရပါတယ်။
မန္တလေးမြို့တွင် ရေပေးရေး ရေကို အများပြည်သူ အားထားကာ အသုံးပြုလျှက် ရှိပြီး ရေတွန်းစက်ရုံများမှာလည်း လျှပ်စစ်ကို အသုံးပြုကာ ရေတွန်းရခြင်း ဖြစ်သဖြင့် ယခု မီးမလာချိန် များလာသည့် အခါ မလွန် ပင်မ ရေတွန်း စက်ရုံတွင် စုဆောင်းရေ နဲလာသဖြင့် အချိန် အနည်းငယ်သာ ဖြန့်ဝေနိုင်တယ်လို့ သိရပါတယ်။
“ ကျွန်တော်တို့ ရပ်ကွက်မှာ ဆိုရင် ညနေ ၄ နာရီလောက်မှာ ရေတစ်ခါ လာပါတယ်။ ဒါပေမယ့် ရေက နဲနဲလေးပဲ ထွက်ပါတယ်။ ပုံးတစ်ပုံးလောက် ပြည့်ဖို့ ၁ နာရီလောက် စောင့်ရတယ်ဗျာ။ ရေလာချိန်က တစ်နာရီ ဆိုတော့ ဒီတစ်ပုံးက ထမင်းဟင်း ချက်ဖို့ပဲ ရပါတယ်။ လူတွေကတော့ ဘုန်းကြီးကျောင်းက အဝီစိတွင်းမှာ ရေသွားချိုးနေရပါတယ်။ တစ်ချို့ အိမ်တွေကတော့ မော်တာတွေနဲ့ စုပ်ကြပါတယ်။ ဒါကလည်း မီးလာမှ ရတာ။ နောက်တစ်ကြိမ် ည ၁၁ နာရီမှာ တစ်ကြိမ် တစ်နာရီလောက် ပြန်လာတာ စောင့်ရပါတယ်” လို့ ချမ်းမြသာစည်မြို့နယ်နေသူ က ဆိုပါတယ်။
“ကျွန်မတို့ လမ်းထဲမှာတော့ ည ၁၁ နာရီ ဆိုရင် ရေပေးရေး ရေ စောင့်ရတာ လူတွေမှာ တစ်အိမ် တစ်ယောက် အနည်းဆုံးနဲ့ တစ်လမ်းလုံး စည်ကားနေတယ်။ ရေက လာပြန်တော့ ကလေးဟိုဟာ ထွက်သလောက်ဆိုတော့ ရေမော်တာတွေနဲ့ စုပ်ကြတာ တစ်ရပ်ကွက်လုံး ပွက်လောညံပါပဲ။ ရေကလည်း တစ်နာရီလောက်ပဲ လာတာလေ။ ရေလာနေချိန် မီးကလည်း ပျက်ဆိုတော့ ဝိုင်းပြီး မေတ္တာပို့ကြရောပေါ့။ ရေလွှတ်တာ ကလည်း ဘယ့်နှယ် ညသန်းကောင် ကျမရှင် … အများပြည်သူ အိပ်ရေးပျက်အောင်” လို့ မဟာအောင်မြေမြို့နယ်က ပြည်သူတစ်ဦးက ဆိုပါတယ်။
လောလောဆယ်မှာတော့ မန္တလေးမြို့နယ် တစ်ချို့မှာ သောက်သုံးရေ အခက်အခဲ ဖြစ်လျှက်ရှိကြောင်း ဒေသခံများက CJMyanmar သို့ပြောပါတယ်။..
No comments:
Post a Comment