မန္တလေးမြို့၊ ဧပြီ ၂၃
အထက်မြန်မာနိုင်ငံစာရေးဆရာအသင်း ဖြစ်မြောက်ရေးကော်မတီတစ်ရပ်ကို ဧပြီလ ၂၂ရက် နံနက်က မန္တလေးမြို့တွင် ဖွဲ့စည်းလိုက်ကြောင်း CJ Myanmar မှ သတင်းရရှိသည်။ အဆိုပါကော်မတီသည် လွန်ခဲ့သော နှစ်ပေါင်း (၇၀)၀န်းကျင်က စတင်၍ နှစ်ပေါင်းများစွာဖွဲ့စည်းတည်ရှိခဲ့သည့် အထက်ဗမာနိုင်ငံ စာရေးဆရာအသင်းကို ပြန်လည်ဖော်ထုတ်ခြင်းဖြစ်ပြီး အထက်ဗမာနိုင်ငံစာရေးဆရာအသင်း၏ ရည်ရွယ်ချက်သဘောထားများကို ဆက်ခံကျင့်သုံးမည်ဟု ဆိုသည်။
အထက်မြန်မာနိုင်ငံစာရေးဆရာအသင်းဖြစ်မြောက်ရေးကော်မတီသည် လွတ်လပ်သောစာပေမူဝါဒများကို ကျင့်သုံးပြီး မြန်မာပြည်သူလူထု၏ ဘ၀ကို ထင်ဟပ်သည့် စာပေများကို ငြိမ်းချမ်းရေး၊ အမျိုးသားရင်ကြားစေ့ရေး၊ ဒီမိုကရေစီရေးဦးတည်ချက်များဖြင့် ဖော်ဆောင်မည့် မည်သည့်စာရေးဆရာ၊ ကဗျာဆရာ၊ သတင်းစာဆရာနှင့် အဆိုပါပုဂ္ဂိုလ်များကို ကိုယ်စားပြုသော အသင်းအဖွဲ့များနှင့် ပူးပေါင်းဆောင်ရွက်မည်ဟု သိရှိရသည်။
ယခုဆက်လက်အကောင်အထည်ဖော်မည့် အထက်မြန်မာနိုင်ငံစာရေးဆရာအသင်းအနေနှင့် တစ်မျိုးသားလုံးနှင့် သက်ဆိုင်သော စာပေ၊ ယဉ်ကျေးမှု၊ လူမှုရေး၊ စီးပွားရေး၊ နိုင်ငံရေးကိစ္စများတွင် သဘောထားထုတ်ပြန်ရပ်တည်ခြင်း၊ ကာကွယ်ခြင်း၊ တောင်းဆိုခြင်းများ ပြုလုပ်ဆောင်ရွက်မည်ဖြစ်သကဲ့သို့ စာဆိုတော်နေ့ရောက်တိုင်း စာပေယဉ်ကျေးမှုနှင့်သက်ဆိုင်သော စာတမ်းဖတ်ပွဲများ၊ အခါအားလျော်စွာ ဟောပြောပွဲများ၊ စာအုပ်စာတမ်းထုတ်ဝေခြင်းများလည်း ဆောင်ရွက်မည်ဟုဆိုသည်။
အထက်မြန်မာနိုင်ငံစာရေးဆရာအသင်းဖြစ်မြောက်ရေးကော်မတီကို ဥက္ကဌအဖြစ် ညီပုလေး၊ အဖွဲ့ဝင်များအဖြစ် ညီစေမင်း၊ သိုက်ထွန်းသက်၊ ညိုထွန်းလူ၊ ကိုရိုးကွန့်နှင့် အတွင်းရေးမှူးအဖြစ် ဆူးငှက်တို့ဖြင့် ဖွဲ့စည်းထားပြီး ကော်မတီအဖွဲ့ကို မန္တလေး၊ ဗိုလ်ချုပ်အောင်ဆန်းလမ်းပေါ်ရှိ လူထုကြီးပွားရေးစာအုပ်တိုက်တွင် ဆက်သွယ်ထားရှိသည်ဟု သိရသည်။
အထက်မြန်မာနိုင်ငံစာရေးဆရာအသင်း၏ အမွေဆက်ခံထိန်းသိမ်းရာ ပင်မအထက်ဗမာနိုင်ငံစာရေးဆရာအသင်းကို ၁၉၄၄ခု ဇူလိုင်လ ၁၉ရက်နေ့က မန္တလေး၊ အာဠ၀ီ စီလမ်း၊ မန္တလေးသူရိယသတင်းစာတိုက်တွင် နာယကအဖြစ် စည်သူမောင်မောင်ကျော်၊ သာသနာရေးဝန်ကြီး ဦးချယ်၊ မန္တလေးသူရိယအယ်ဒီတာချုပ် ဦးခင်မောင်၊ ဦးကိုလေး (ဇေယျာမောင်)၊ အတွင်းရေးမှူး သူရိယဦးသန်းမောင်၊ အဖွဲ့ဝင် တိုင်းချစ်ဦးသိန်းဖေနှင့် အထူးအကြံပေးအဖြစ် မြမျိုးလွင်နှင့် ရွှေဥဒေါင်း တို့က ဆောင်ရွက်ခဲ့ပြီး ရန်ကုန်မြို့ရှိ မြန်မာနိုင်ငံစာရေးဆရာအသင်း အထူးကိုယ်စားလှယ်အဖြစ် ကြီးပွားရေးဦးလှ (လူထုဦးလှ)က ဆောင်ရွက်ခဲ့သည်။
အထက်ဗမာနိုင်ငံစာရေးဆရာအသင်းသည် ၁၉၇၂ခုနှစ်အထိ စာဆိုတော်လရာသီရောက်တိုင်း စာပေဆိုင်ရာပြဇာတ်များကပြခြင်း၊ စာတမ်းဖတ်ပွဲများကျင်းပခြင်း၊ လူထုလေ့လာရေးခရီးစဉ်များထွက်ရှိခြင်းများ ဆောင်ရွက်ခဲ့ရာ ပြဇာတ်(၅)ကြိမ်ထက်မနည်း ကပြခဲ့ပြီး စာတမ်းပေါင်း (၆၃)စောင်ထက်မနည်းလည်း ဖတ်ကြားခဲ့ကြောင်းသိရှိရသည်။ အထက်ဗမာနိုင်ငံစာရေးဆရာအသင်းက နှစ်စဉ်စာဆိုတော်လရောက်တိုင်း အနောက်ကျုံးလမ်း ဓမ္မဗိမာန်တွင် ဖတ်ကြားခဲ့သော စာတမ်းများမှာ မြန်မာစာပေလောကအတွက် လှုပ်ရှားမှုအရှိခဲ့ဆုံး စာတမ်းများအဖြစ် ထင်ရှားခဲ့သည်။
အထက်ဗမာနိုင်ငံစာရေးဆရာအသင်းတွင် စည်သူမောင်မောင်ကျော်၊ မန္တလေးသူရိယ ဦးခင်မောင်တို့မှအစ ရွှေဥဒေါင်း၊ မြမျိုးလွင်၊ ကျောက်စာဝန်ဦးမြ၊ စစ်ကိုင်းဦးဘိုးသင်း၊ ရွှေပြည်ဦးဘတင်၊ မြကေတု၊ ဦးဆန်းထွန်း၊ ရွှေကိုင်းသား၊ လူထုဦးလှ၊ လူထုဒေါ်အမာ၊ ကြည်မြ၊ နှင်းဦး၊ ဒေါက်တာသန်းထွန်း၊ ပါမောက္ခဦးကျော်ရင်၊ မောင်သာနိုး၊ မောင်စွမ်းရည်၊ တင်မိုး၊ မောင်သစ်လွင်(လူထု)၊ လူထုစိန်ဝင်း၊ ကြည်အောင်၊ ကိုလေး(အင်းဝဂုဏ်ရည်)၊ သိန်းသန်းထွန်း၊ ဦးမောင်မောင်တင်(မဟာဝိဇ္ဇာ)၊ ရဲဘော်နေအောင်.... စသည့် စာရေးဆရာ၊ ကဗျာဆရာ၊ သတင်းစာဆရာများ ပါဝင်ဆောင်ရွက်ခဲ့ကြသည်။
No comments:
Post a Comment